Information
3. Anhang
STATUTARRECHT DER STADT RÜDEN
(Nach Seibertz Urkundenbuche. Bd. II. S.69ff.)
In nomine domini amen. In dussen boke synt ghescriuven de guden recht de der stat van Ruden synt ghegheuen dur ghenade willen dat se syc de bet gheuestene Dat heuet ghedan de ghude byscop Philippus de do biscop was tho Colne Date hede he myt willen und myt rade des bombkens Wedekines de do dombeken waas und myt willen des dom prouestes Brunes de do dom prouest was und des ghemeynen Capiteles van Colne do dat ghescha dat dede he myt rade der ghener heren de do by eme waren dat was her Johann van keslike de do was prouest tho Sost. Greue Euerhart can Altena. her Henric van Volmesteyne. her Goscalc van patberg, her Reghenhart van Sydenchusen. her ernst de do kerchere was tho Ruden. her hillgher de sculthete to sost. her Almer van horste. her bertram und her anselm brodere van bruerdinchusen und ander heren und rittere ghenoch dat ghescha an dem yare als men do scref van der ghebort unses heren Mo.Co.LXXo. octauo.
-1.) Dyt ys dat yrste recht dat wy der stat tho Ruden hebben ghegeuen: Tho dem yrsten hebbe wy der stat van Ruden de ghenade gheuen dat se moghen prouen und khesen dat se menet dat er stat nutte sy als tho vestene und tho betternde ere stat und tho vrede und tho allen articulen de se prouen kunnen de en nette syn und moghen dat don myt unsen guden willen und sunder broke unses gherichtes da se en solen nicht khesen dat weder uns sy und unse stichthe van Colne.
-2.) Dyt ys eyn recht efthe we de kore breke Were dat sake dat we de kore breke este anverdighede der stades vestene also dat he da scaden ane dede et were buthen eder binen er stat den moghen se vorboden op ere hus und spreken en dar umme an myt rechte en keuet he so mot het tve borghen setten heuet he neyne borghen so moghen se en in ere hachten setten also lange gheuen wolde in der stat tho ruden de hedde sine borgherscap vor loren also dat he und syn gut neyn borgherrecht en eghet also lange winte en de borghermestere und de rayt weder in de borgerscap nemet.
-3.) Dyt ys eyn ander recht Were date sake dat we ghebroken hedde als hy vorghescreuen steyt were dat den Rayt drye vorbodede und he nicht en queme de en eghet neyn gheleyde in der stat to Ruden das se moghen en ere knechte laten angripen und laten en in ere hachten setten also lange winte en vul sche und moghen dat don sundern broke des gherichtes.
-4.) Dyt ys eyn ander recht este se ere stat este ere veltmarke vestenen wolden Were dat sake dat se er stat ofte ere verltmarke vestenen wolden dat were wa mede dat et were dat moghet se wol don-sunder broke.
-5.) Dyt ys eyn ander recht So welic mensche tho Ruden in varet und al dar he tho eynen borgere entfangen wert he come van wilkem lande he come he hore who wilkeme heren th tho hore de sal ghenethen alsodane vrygheyt und also danen rechts als der stat van Ruden ghegeuen ys.
-6.) Vort mer eyn ander recht So welic man in der stat tho Ruden eyn borghere ys de en sal neynen heren noch yuncheren noch neymande kheysen bouen unsen heren van Colne noch bouen den borghermester und rayt tho ruden und ok weder syne ghemeynen borghere also dat he neyn recht nemen eder dat he vredelos were este et en were also vele dat he yn dussen vorgen. vrede daghen breke efthe broken hedde so moste he beteren als eme dat recht tho wyset und de broke synt der stat.
-7.) Vort mer eyn ander recht So welic man en borghere tho Ruden ys den en mach neyn man vyt laden myt dem sverde tho neyme ghogerichte Wil we enen borghere sculdigen de sal eme gulde und recht don vor dem richthe tho Ruden dat unses heren van Colne ys.
-8.) Dyt ys eyn ander recht van dem vryendinge Hyr steyt al so ghescriuen eyn gherichte dat hetet vrydinc dat el salmen in der stat tho Ruden noch hebben noch holden.
-9.) Vort me van dem seluen rechte Dat neymant neynen borghere vyt der moeren en mach laden der stat to ruden tho dem vryendinge umme sake de men richten mach vor gherichte unses heren van colne et en sy also vele dat welic man de erflyken vryengude tho deghedingende hedde de mochte syn vrygdinc holden.
-10.) Vort mer eyn ander recht wo men gheleyde gheuen mach in der stat tho Ruden So welic man eyn richtere in stat tho Ruden üs de mach eyme nuweliken menschen gheleyde gheuen ane den borghermester und den rayt. Vort me so mach ok de borghermester este de rayr doyn este de borghermester da nicht heme en were ane den richtere.
-11.) Vort me eyn ander recht van deme seluen gheleyde Weret also dat deghene de dyt gheleyde bede vredelos were so en mochte de richtere ane den borghermester noch de borghermester ane den richtere nicht don be haluen se moghen sementliken eynen credelosen manne sycher gheleyde gheuenen in er stat to Ruden.
-12.) Vort me stet hy also welich man dat gheleyde breke dat de richtereefthe de borghermester sunderliken eder sementliken gheuent wat syn broke were Were dat also dat ghemant dat gheleyde wetens efthe vreueliken breke de solde dem richtere weden vif marc und den borgheren theyn mark und eyn voder wines.
-13.) Vort me wen men gheleyde in der stat hebben mach, So we in de stat tho Ruden queme des vrydahes also als verspere gheluyt were de solde hebben gut gheleyde van der tyt den saterstach und den sunnendach al.
-14.) Vort me eyn ander gheleyde, So we des mandaghes na vespere in de stat tho ruden queme de solde hebben gheleyde und den nesten dynschedach dar tho den dach al efthe et en were also vele winte en vor den broke vol sche
-15.) Vort me sint hyr bescriuen mer vrede daghe, So we in de stat tho ruden queme tho allen groten hoftyden dat ys tho paschen tho pinkesten the mytwinttere tho allen unser vrowen daghen tho allen apostel daghen tho allen godes hilghen daghen also dicke als men alle seyle begheyt und tho allen kerycwigen eynen dach vore und eynen dach na myt sodaneme underscheyde als hy vorgescriuen ys.
-16.) Vort me sint hy bescriuen vrede daghe in der yarmarket Dat yrste yarmarket ys alweghe wys weken na paschen dat hetet tho me haghen dat waret neghen daghen dat andere beghinnet an sunnte pantalion auende und waret dre daghe. All de ghene de tho dussen yarmarkeden comet in de stat tho ruden de solen hebben sicker gheleyde also als hyvor gescriuen is.
-17.) Vort me so hebbet de borhere eyne ghenade under sich, so welic borghere nyt dem anderen borghere ycht heuet tho deghedingende da eba af comen moghen wan et comet in de bslotenen tyt dat ys wan men alleluia beghet winte in de alingen weken na paschen des mandaghes so mach manlich dem anderen ede sveren und don dat recht ys.
-18.) Vort me ys eyn ander recht van ladingen Hyr steyt also dat neyn leyghe eynen borghere laden an mach uyt der stat neyn recht vor gherichte scheyn en moghe.
-19.) Eyn ander recht wo men den richtere setten mach So welic richtere den unse here von Colne settet efthe syn ammetman dey en mach nicht richten in der stat to ruden este neyn vrone van siner weghene he en werde yrst borghere und fuere dat he vort van dusme daghe de stat van ruden helpe hoden und waren to vorn unsme heren sunte petere na unsme heren van Colne vortme truwe und holt to synde al sinen borgeren dat eme got hellpe und alle hilghen.
-20.) Dyt ys eyn recht wo men dat richte fueren sal. So we eyn richtere wert de fal fueren dat he eyn recht und ghenedich richtere sy unsme heren van Colne to sime rechte der stat van ruden to erme rechte also vere als eyn sine vif sinne leren dat eme got helpe und alle hilghen wan dat ghe scheyn ys so mach he wol richten.
-21.) Hy na ys eyu underscheyt ghescriuen we in der stat to ruden richten moghe. Tvene vronen moghen ok wohl richten de van oldes sind ghewesen den eynen mach wol setten de richtere den anderen de borghermestere und de rat moten ok sueren aly hy vor gescriuen steyt.
-22.) Ru hy echt eyn ander under sceyt gescriuen wo men richten moge. Were dat also dat eyn richtere este syn vrone den he ghesat heuet van er bosheyt est van vronscap este van hate este dor lones willen este van entvorten nicht richten en wolde este et en de borghermester und rat don hetet dan de broke de dar van vallet de sal men halden to hant unses heren van colne este synes richters Ande de stades vrone mach wol vul gherichte don to halse und to hande und to alme rechte und anders so en mach de vroue nicht richten sunder vorhencnisse des richters et en heten syn stat don myt dan undersceyde als hy besreuen ys.
-23.) Hy na steyt an ander recht van pandinge weghen de dat richte an ruret. Were dat also dat eyn den anderen vor gherichte vor golghede als eyn recht were van scult weghene este van anderen Saken dat he myt rechten ordelen wonne also dat he en panden mochte de solde den richtere bidden dat he eme der pandingen hulpe weret also dat eme de richtere der pandingen nicht helpen en wolde so mochte de stat eren vronen heten dat he myt rechte dem gheine der pandinge hulpe und wane de pandinge schuyt so heuet deghene de de pandige lidet eyne maryc vor wedet dem richtere
-24.) Hy na steyt eyn ander recht van ordelen de bor gherichte nicht ghedelet en kunnen werden. Were dat also dat men umme ordele vor gherichte vrghede de da nicht ghedelet en kunden werden de solde men bringen vor den rat da folden comen de saqualden twene de de ordel an gheuen myt eren beden vorspreken und de ghene myt en de des ordeles ghevraghet were. Dat solde de svrone rat delen Andeskunde des de rat so snel under sich nicht eindreghede werden so mochte dat de rat wol up nemen dre weken dar na en binnen solden se sic also vor varen dat se dat ordel delden na eren witten und na eren sinnen. Dar en bouen en mach dat ordel neymant sculdeghen noch scelden also als se wyset vor recht und dat moghen se dan in ere boch tekenen uppe dat et unvorgheten bliue.
-25.) Hyr sy eyn ander recht van doyt slghe Ghereke dat also dat eyn mensche den anderen dodede .... he sloghene este he steke enne efthe wilkes dodes he en dodede wyrt de begrypen den fal men doden als syn recht ys so solen syn rechten erven alle syn gut Erve und varende gud bede bynnen der stat und buthen der stat behalden also dat de richtere an dem gude nicht en eghet.
-26)Vort me steyt hy eyn ander recht van doit slaghe Ghereke dat also dat eyn den anderen doyt sloghe und dede des eyne vorevlucht undworde de da umme vredelos gheleghet syne rechten eruen solden syn gut besitten und da en eghet neyn richtere este neyn ammetman nycht an.
-27.) Hyr steyt echter eyn ander recht van doyt slaghe Ghereke dat also dat we eynen doyt slach dede yn dyr stat und hedde neyne erven de syn gut tho rechte mochten up boren so solde sie de richtere des gudes tho rechte under wynden.
-28.) Dyt ys eyn ander recht van egachten wapenen Were dat also dat eyn den anderen blot wundede myd sverde este myt messede este myt anderen egachten wapenen deghene de dussen broke doyt de heuet dem cleghere eyne mark und deme gherichte dat wapen und veyr scillingen und der stat den hoghesten broke.
-29.) Hyr steyt eyn ander recht. Were dat also dat eyn den anderen sloghe myt der vust efthe myt clupele este myt anderen dyngen dat dumslach hetet den broke mach he dem richtere vor betteren myt veyr scillingen.
-30.) Hyr ys eyn ander recht van hus sckynge. Were dat also dat eyn den anderen myt ghewalt in syme hus sochte dat he en dechthe to slande este tho dodende worde he des vorwunen als eyn recht were umme den broke hedde he syn lifvorboret.
-31.) Dyt ys eyn ander recht van versate. Were dat also dat we den anderen moyede efthe scadede myt vorsate und worde he des verwunen so solde he dem cleghere eyne mark gheuen tho betheringe ande den (deme.) richtere eyne mark und der stat sol he beteren also als eyn recht ys.
-32.) Hyr ys besriuen eyn recht van wanmate. Were dat also dat yenich mensche wer vrowe efthe man wanmate dede myt mudde efthe myt scepelew myt bekere efthe myt waghe efthe myt elen efthe myt yenighen ander mathe. Worden se des vor wunen myt eyme rechthe de solde synen broke der stat vorbeteren Und so wanne he synen broke beteret heuet so en mach en da neyn richtere noch vrygreue noch neyn man umme des seluen broke an spreken noch vyt der stat tho ruden laden. Sunder were dat yenich den menschen de den broke ghe dayn hedde na syner betteringe umme den seluen broke in der stat efthe buthen beclaghede de solde wedden wyf mark unsme heren van colne ande dar ua sal he an syme rechthe bestan.
-33.) Hyr steyt eyn ander recht van den hoghesten broken Vort me ys dat recht dat al dat ghelt dat da comet van den hoghesten broken sal werden gelyghet in de betteringe der stat van Ruden.
-34.) Hyr steyt eyn recht efthe we dem borghermester efthe dem rade in ere ede spreke. Were dat also dat we dem borghermester efthe dem rade an er ebe spreke kunde he es nycht vollen bryngen als recht were so solde he de seluen vare stan de eme de borghermester efthe de rat stan moste efthe he et vollen vaten kunde als recht were.
-35.) Hyr steyt eyn ander recht Were dat also dat eyn dem borghermester efthe dem rade sceldewort gheue al so dat he snode wart en gheue de en en ere ede nicht en ghingen de hedde ghebroken dem borghermester tve eymer wynes und eyme uliken unt dem rade eynen unde der stat de hoghesten bothe also vere als de wart van der stades weghene synt.
-36.) Hyr na steyt eyn ander recht. Were dat sake dat eyn dem anderen wart gheue an lyf und an ere ghynen de breket dem cleghere eyne mark und dem richte veyr Scyllinge Vortme were dat eyn dem anderen bose wart gheue de eme an syn lyf nicht en ghyuen de breket dem cleghere veyr scillynge und den richte veyr scillynge yderem.
-37.) Dyt ys eyn recht van rove efthe van duve. Were dat also dat eyn mensche vonde syn gut in der stat tho ruden dat af eme gherouet efthe vorstollen were und hebbe he dat myt rechthe al dar behalden vor gherichte so sol de derde deyl des seluen gudes deme richthere dat andere sal de behalden des dat gut ys.
-38.) Dyt ys eyn recht van valschhen penyngen. Were dat also dat valsche penynge under hynen borghere vonden worden tho Ruden in der stat da enemochte en neman umme an spreken wyl he dat behalden ouer den hylghen dat he dat syn dar umme ghegheuen hebbe.
-39.) Hyr steyt eyn ander recht efthe eyn weder den anderen eyn huys copet in der stat efthe eyn houestat de ghene de dat vorcopet de sal borghen setten yar und dach vor rechthe ansprake ne comet dan neyment bynnen der tyet dat ys eyn yar und ses weken de dar na dan queme und spreke en an myt rechthe de ghene de dat ghecoft heuet und beseten heuet dem ys dat nar tho behaldene myt syner eynen hant ouer den hylghen dan et eme yen man afghedeghghedyngen moghe myt rechthe Und van deme de dat copet sal de richthere hebben XII penynge van eyner gansen hovestat und van eyner haluen VI were des of myn so solde he dar af gheuen als sich da van borde.
-40.) Hyr na steyt eyn ander recht wo men de wortpenynge sole gheuen Hyr steyt also gescriuen dat unse here van colne yo van eyuer alyngen houestat sal hebbeb ses penynge ande twe honere und van eyner haluen houestat dre penynge und eyn hoyn und also vortmer na der grotede der houestat solen worrpenynge werden gheghyuen in sunte Conebertus daghe Nochtan synt hyr ok houestede de der wortpenynge nicht en pleghet to gheuene Ok were dat also dat we de wartpenynge nycht uit en gheue uppe sunte vunebertus dach so solde de richtere eynen knecht senden dem borghermestere so sal de borghermester den stades knecht myt dem knechte laten gan dat he eme wyse uppe de wort da dat wortghelt achter steyt da mach de knecht also gude pande nemen dat he dat ghelt wol ane winne tho hant unses heren van colne.
-41.) Hyr is eyn recht bescriuen efthe eyn vrnwe efthe eyn man storue we ere gut hebben solde Ys dat also dat eyn vrowe efthe eyn man in der stat to Ruden synt und kyndere hebbet steruet der eyn so sulen de kyndere den haluen deyl des gudes behalden ande den anderen haluen deyl sal de vader efthe de moder wylich er leuendich blyuet behalden Vort me were dat also dat de man efthe de vrowe de leuendich bliuet sych vor ander sedede efthe also blyuen so sal he dat erflike gut tho syme lyve behalden den halfthen deyl also ok de vrowe so wan he dan sternet so sulen de yrsten kindere den seluen haluen deyl tho sich nemen.
-42.) Dyt ys eyn ander recht Is dat also dat eyn man efthe eyn vrowe in der stat tho ruden wonet und neyne kindere en hebbet steruet der eyn so sal deghene welic er leuendich blyuet den verdeb del al syues gudes den nesten rechten eruen gheuen de deme tho horet de da storuen ys.
-43.) Hyr ys eyn ander recht Were dat also dat lude weren de kindere hedden und der eyn vor velle und de andere vor andersedede syc und de kindere bleuen sementliken eynweldich vor velle der kindere eyn dat andere solde et eruen.
-44.) Hyr steyt eyn recht van herwede dat men in der stat van ruden gheuen sal Were dat also dat eyn man storue in der stat tho ruden so solde syn eldeste sone dat herwede up boren also vere als he sone hedde hedde he nene sone so solde et de nefthe up boren van der svert syden.
-45.) Hyr na steyt dat tho dem herwede horet tho dem yrsten salmen gheuen al eynes mannes scapenen cledere Vortme wer et eyn bovman eyn pert dat nest dem besten were Were auer dat eyn borghere nicht me dan eyn pert en hedde dat solde in der were blyuen dorch nut willen der stat. Vort me salmen gheuen eynen haluen waghen dat sal syn dat vorderdel Vortme eyn kyste da eyn svert moghe ine leghen Eynen kethel da men eyne sculderen mochte yue seden Vortme hedde eyn man tvier hande wapen tho syme lyue dat beste solde in der were blyuen dat andere solde men tho dem herwede gheuen wes da nicht en were des en darf men nicht gheuen.
-46.) Dyt sal gheuen eyn wegheuer tho al den dingen de vorgschr. staet. Eyn hant bylen. eyne barde. twe neugeher dar men de namen mede bord. dat kym vseren dar men de nauen mede ut sleyt. eyn snyde mest. eyn deyffel.
-47.) Wer et eyn beckere So gheuet he tho dussen vorg. dingen efthe se da sint twe knede troghe scatelen voyrvorken gherstel spankel.
-48.) Wer et eyn wollen weuere so gheuet he tho dussen vorg. dingen est se da sint syn thowe eyn par spolen und eyn spol thowe twintich par clouen.
-49.) Is et eyn scomekere so gheuet he tho dussen vorgen. dingen est se da syn snidebret syn bylenmesset eynen knyp und eyne suele.
-50.) Wer et eyn Smyt so gyuet h e tho dussen vorgen. dingen est se da synt syne blaasbeelghe synen hanthamer eyn lopen eynen hofhamer eyne hoftangen eyn scortheuel und eyn scufyseren.
-51.) Wer et eyn tymmerman so gyft he tho dussen vorgen. dyngen est se da synt syne bylen syne barden syne suleren und eynen bantnenegher.
-52.) Wer et eyn scredere so gyft he tho dussen vorgen. est se da synt syn stecscheren und syne hantscheren.
-53.) Wert eyn vleschowere so gyft he tho dussen vorgen. dyngen est se da synt syn vleschbylen syne vleschbarden syne vleschcbanc und syn messet.
-54.) Wer et eyn lynen weuere so gyft he tho dussen vorgen. dingen est se da synt syn stelle und synen sclach kam Wes in al dussen vorgen dyngen nycht en were des en darf men nicht gheuen.
-55.) Dyt ys eyn recht wo me de gherade yn der stat tho ruden gheuen sal und de sal upboren eyn dochter oder eyn prester eder eyn scolere als hy na ghescriuen steyt al so vere als se da synt Synt se dar nycht so sal et up boren de neste vau der spynelsyden Were et also dat eyn vrowe eyne dochter beredet und de vrowe mer dochter heuet boren de gherade van der moder et en sy al so vele dat se de dochtere al beraden hedde so solde de eldeste dochter de gherade boren dat ys eyn recht al so vere als dusse vorgen. dochtere syn eynweldich van vader und van moder.
-56.) Dyt ys eyn ander recht Vort me weret also dat eyn vrowe eyne dochter hedde und er ere man vor storue und se eynen anderen man neme und van deme eyne andere dochter hedde so solde yo de yerste dochter de se van dem yrsten manne hadde se sy in der were este buten der were der moder gherade boren.
-57.) Dyt ys eyn ander recht vort me weren dre sustere eder me de neyne moder en hedden und der eyn beraden worde weret also dat der anderen sustere de eynweldich bliuen eyn vor sturve so solde de aldeste de in der were ys der gherade boren aller lyc der anderen de unvorschede sint sunder weren se al beraden so boret de aldeste suster de gherade se sy in der were este buten der were.
-58.) Dyt ys eyn ander recht Wer et also dat eyn vrowe mer dochtere hedde dan twe de eynen hedde se beraden und van den anderen were se vorscheden sturve de dochter de beraden were so solde de moder de gherade upboren dan sturve der anderen dochtere eyn de eyweldich weren so solde de eldeste suster der anderen gherade upboren de unvorscheden weren.
-59.) Dyt ys eyn ander recht wer et auer dat eyn vrowe sturve de neyne dochter en hedde hedde de eynen sone de eyn prester were efthe eyn scolere were de boret dat gherade auer de scolere sal dat bewysen myt syme rechte dat he eyn prester werden wille eder he sal borghen da vore setten.
-60.) Dyt ys wat tho dem gherade horet. In der were sal bliuen eyn bedde alync mit alme tughe also als et stunt by des doden menschen leuene dar tho sunderlikes eyn par lakene tho dem bedde ok sal in der were blyuen der kindere der knechthe und der meghede bedde myt alme thughe also als et vore stunt vortme eyn stolkussen eyn arkussen eyn dyslaken eyn hantduele des des ghesindes dyslaken Ok bliuet in der were lynen laken dat vor dem weuere were Tho dem gherade salmen gheuen alle kledere de ghesnyden synt tho eyner vrowen eder Junckvrowen lyue Alle ander bedewant aue dat vor vyt ghescriuen ys Vortme alle kussene alle lakene vorspan und al gheschmyde also als et tho eyner orowen eder Juncprowen lyue ghehart heuet Vortme eyn clederkiste lynen laken dat beghunt were af thosnydende Gharen dat dem weuere ouerlopen were Und alle gharen Lyn da buthen den knothen were Hekelt plas eyn hekele eyn gharwynde eyn haspel eyn rocke eyn spynel und eyn werue gordel Budel Messet also als et tho erme liue ghehart heuet Wes da nycht en ys des en darf men bicht gheuen Vortme weret also dat de gherade weren vallen up eyne vrowen eder Juncvrowen und de sturuen yr dan se de gherade vterden de solden de seluen gherade gheuen myt erme gherade in al der wyse als hy vorgescr. Steyt Vort me weret eyn eywonich mensche des bedde myt alme thughe sal blyuen in der were dem nefthen Dat andere sal men gheuen tho deme gherade in aller wise als hy vorgescr. ys Vort me weret eyn bruersche de dar storue so blyuet in der were eyn badekuven eyn athkuven eyn byrleghelen eyn dunnebirs leghelen Were dat da nicht dan eyn byrbode de selue blyuet in der were al de anderen vate de tho dem bruende horet sal men tho dem gherade ghyuen myt al den stucken de hy vorgescr. sint wes da nicht en ys des en darf men nicht gheuen.
-61.) Hyr ys eyn recht bescriuen efthe we eynen man begrype in syner were by syner dochter Were dat also dat eyn man ofthe syn vront eynen man begrype by syner dochter in syner were den mochten se halden ane bruke des gherichtes und duyngen en dat he de juncvrowen tho echthe neme Of he der nyth en wolde so solde he der Juncvrowen gheuen thenn mark.
-62.) Dyt ys eyn ander recht van eynes mannes nychten Were dat also dat eyn man efthe eyn vrowe eyne ere nichthen myt sic hedde dor vroscap efthe dor hode Also dane recht eghet se als eynes mannes dochter este we by er begrypen worde es se neyn ghmedet maghet en sy Were et also eyn man entqueme eynen manne ofthe eyner vrowen de en in der were begripen hedde den mach men sculdghen vor deme rade also als eyn stades recht ys.
-63.) Hyr ys eyn ander recht bescriuen van eynes mannes wyue Were dat also dat eyn man in syme hus este in siner were eynen anderen man begrype by syner husvrowen de se hadde h´ghekrenket den mochte he doden ane broke.
-64.) Dyt ys eyn ander recht van eynes mannes maghet Vortme so ne sal noch ne mach neynman van rechthe by syner ghemededen maghet eynen man van efthe halden sunder he sal en laten en wech ghan sunder broke.
-65.) Dyt ys eyn recht ofthe we eynen verdendel ofthe eyn herwede ofthe eyn gherade indeghedingede dat he neyn recht tho en hedde wat syn broke Were dat also dat we eynen verdendel ofthe eyn herwede ofthe eyn gherade indeghedingede da he neyn recht tho en hedde also dat he des vorwunnen worde vor deme rade als recht were de breke der stat eyne mark.
-66.) Dyt ys eyn recht van syse als van wyne und van byre vallen mach Hyr ys also ghescriuen dat allet dat ghelt dat van syse vallen mach als van wyne und van beyre dat sal de rat up boren und leghen dat an nut und befthe ere stat.
-67.) Dyt ys eyn recht van richthebode Were dat sake dat eyme vor gherichthe boden worde also dat et dat yrste bot were de mach wol mit panden bereden ane wilcor des he en kende efthe des he myt rechthe erwunen worde den wilcor moste he halden.
-68.) Dyt ys eyn ander recht Were dat sake dat eyme vor gherichthe boden worde also dat et dat andere bot were de en mach myt neynen bereden se es syn also gut dat he syn sementlike ghelt ane wynnen moghe also also he vor gherichthe de yrsten claghe up en gheclaghet heuet und de pande sal he nemen myt cunscap0 des gherichthes und so heuet de ghene de dat andere bot ghelyden heuet ghebroken dem gherichthe veyr scyllynge
-69.) Dyt ys en recht efthe we so ovele dede et were van worden eder van werken dat eme an syn lyf ghynge und des eyne vorvlucht dede wo men den vredelos leghen solde Were dat also dat we also ovele dede et were an worden eder an werken also dat et eme an syn lyf ghyne und worde de der bosen dat vorvluchtych den solde men drye soken myt gherichthe in syner herberghe heuet he neyne herberghe so dal en dere richtere by namen drye eschen efthe he dar ghycht sy efthe yeman van syner weghene de ene tho rechthe verantworden wille ys da nemant so sal de cleghere myt rechthen ordelen vort varen und wynnen dat myt rechthe dat de richthere heghe eyn richte dat hetet eyn ghorichte wan de rechtere dat richthe gheheget heuet so sal de cleghere arlof bydden dat he mothe vyt theyn eyn svert und mothe en besrigen also dat he drye spreke wapene yo, So sal he dan myt ordelen ererven dat en dat gherichthe drye yn esche efthe he da ghycht sy efthe yeman van syner weghene de en tho lantrechthe vorantworden wille ys da nemant So sal de cleghere myt ordelen wynnen vort dat en eme de richthere in syne herberghe kunde Also dat he eme eyne duarnacht leghe dat ys van der tyt uppe den derden dach tho rechther none so mach he comen vorantworden sych und stand syne vare als eme dat recht tho wiset dan komet he nicht So mach de cleghere dat mit ordelen erweruen und wynnen dat en eme de richthere mot vredelos leghen sunder wedersprake Were auer dat de hant dedyghe als hy vorgescriuen ys neyne herberghe en hedde so sal der richtjere ghaen up eyne wegheschede und kunden en veyr ende inte deme lande myt also daneme rechthe als hy vorgescriuen ys Und so mach eme ok de cleghere volghen myt al so daneme rechte als hy vorgescriuen ys.
-70.) Dyt ys eyn ander recht Were dat also dat we wen wolde vredelos leghen umme lonede efthe umme scult efthe umme wate sake dat et were de eyme an syn lif nycht en ghyne de solde en bescrigen als hy vorgescriuen ys dan de richtere sal den man kunden de in deme richthe bescryeghen ys tho dreyn verteyn nachten als hy vorgescriuen ys und vorantworden sych dan komet he nicht und vorantwordet sich uppe de lesten veyrteyn nacht dat ys up de sesten weken So mot de richtere dem cleghere richten und leghen en eme vredelos.
-71.) Dyt ys eyn recht we in deme ghogerichthe breket wat syn broke sy Were dat also dat eyn in dusme richthe breke bynnen der stat tho ruden de breket unsme heren van Colne nicht me dan also dane broke als uns unse heren van Colne und dat ghemeyne Capitel van colne beghenadighet habbet dat synt also dane broke als hy vorgescriuen stat de men breken mach in deme gherichthe dat men pleghet tho haltende deghelikes in der stat tho ruden.
-72.) Dyt ys eyn ander recht van bruken In der Stat tho ruden da en kan neymant me breken dan veyr scyllinge eder dat lif myt so daneme underschede ane alsodane broke als in dussen boke ghescriuen stat breket he unsme heren van colne und der stat und ok deme cleghere.